Ақпан айында Павлодар 2-ЖЭО өзінің атаулы мерейтойын – станцияның құрылғанына 65 жыл толуын атап өтеді. Алты онжылдықтан астам уақыт ішінде станция 35 млрд. кВтсағ-тан астам электр энергиясын және 70,2 млн. Гкал жылуды өндірген.
Барлығы неден басталды
2-ЖЭО-ның алғашқы турбоагрегаты 1961 жылы 1 ақпанда іске қосылды. Бұл оқиға Павлодар өңірінің келбетін мәңгілікке өзгерткен жаңа өнеркәсіптік дәуірдің басталуын білдіреді.
«Сағат 1:15-те генератор жүктемеге қосылып, Павлодар қаласының энергожүйесіне өндірістік тоқ берілді», - деп жазылған тарихи баянат жолдарында.
2-ЖЭО-ның іске қосылуы өлкенің дамуы үшін қуатты серпін болды: оның арқасында қысқа мерзімде алюминий, ферроқорытпа және комбайн зауыттары, Ақсу МАЭС сияқты индустрия алыптары салынып, жаңа тұрғын алаптары бой көтерді. Осылайша, станция қаланың өнеркәсіптік дамуының берік іргетасына айналды.
Жаңғырту және әлеует
Көпжылғы жұмысына қарамастан, станция үнемі жаңартылып отырады. Жыл сайын күрделі және кеңейтілген жөндеу жұмыстары жүргізіліп, заманауи автоматика енгізілуде. Компанияның алдағы жоспарында №1 турбоагрегатты ауқымды қайта құрылымдау жұмыстары көзделген.
Бүгінгі таңда 2-ЖЭО-ның белгіленген электр қуаты 110 мВт, жылу қуаты - 332 Гкал/сағ құрайды. «ПАВЛОДАРЭНЕРГО» АҚ құрамында станция Павлодар өңірінің 600 мыңнан астам тұрғындары мен 13 мыңға жуық заңды тұлғалары үшін тыныс-тіршілікті қамтамасыз етудің өзегі болып табылады.
Техникалық жетістіктердің негізінде үлкен команданың қажырлы еңбегі жатыр. Қазір 2-ЖЭО-да 380-нен астам кәсіби маман жұмыс істейді.
«Біздің кәсіпорынның ең қымбат қазынасы, алтын қоры – бұл адамдар. Станциядағы дәстүрлер сабақтастығы өзгермейді: ардагерлер жас мамандармен тәжірибесімен бөліседі, осылайша ұрпақтар арасында мықты байланыс қалыптасады», - деп атап өтті «ПАВЛОДАРЭНЕРГО» АҚ бас директоры Олег Щемель.
Энергетиктер ауа райына қарамастан, күнделікті ауысымға шығып, туған қаламыздың үйлерінде тұрақтылық, жарық пен жайлылықты қамтамасыз етеді.